Op sneon 5 oktober 2024 waard Fries Museum op Paad offisjeel ôftrape yn Swichum. Mei in feestlik programma koene bewenners fan Swichum en omkriten yn de kunde komme mei harren eigen skiednis. It museum naam de ‘Fibula van Swichum’ mei dy’t yn 2020 troch Robbert Velt fûn waard yn it doarp, en no foar it earst te bewûnderjen wie foar publyk. Mei muzikale stipe fan Brassband Wurdum, waard de bus ûntbleate foar in belangstellend publyk. Yn totaal besochten sa'n 140 besikers dit earste programma besteande út in workshop, in lêzing fan Diana en Robbert Velt, én in demonstraasje fan Velt yn it fjild. Omrop Fryslân brocht ferslach út (ek te lêzen op NOS.nl). Ruben van Vliet makke de foto’s.
