seisbierrum

freed 22 november 2024

Op freed 22 novimber 2024 wie it Fries Museum te gast yn Seisbierrum mei it bysûndere ferhaal fan Folkert Bergsma. Folkert dûkte yn de Twadde Wrâldoarloch ûnder yn Seisbierrum en waard dêr ûnderdiel fan it ferset yn de lokale 'Knokploech'. Op tweintichjierrige leeftiid wurdt er oppakt en deasketten troch in fjoerpeloton. Oan'e hân fan ferskate persoanlike foarwerpen waard it ferhaal fan Folkert ferteld yn de âlde skoalle. Mei in programma foar jong en âld stiene wy stil by syn libben en fierden wy de frijheid dy't wy, tanksij minsken as Folkert, hawwe.

Famyljes mei bern koene oerdeis oanskowe by in famyljeworkshop en 'geheime bewardoaskes' meitsje. Jûns fertelde ekspert Marre Sloots fan it Fries Verzetsmuseum mear oer it bysûndere ferhaal fan Folkert Bergsma en oer de Knokploech fan Seisbierrum. Ek binne der de hiele dei ferskate oare foarwerpen te besjen yn de museumbus, wêrûnder in orizjineel skilderij fan Piet Mondriaan.

Datum: freed 22 novimber 2024
Lokaasje: de âlde skoalle (Adelenstrjitte 6)

Aron Weidenaar makke de foto's.

oer folkert bergsma

Yn maaie 1943 set de 19-jierrige Folkert Bergsma ôf nei Fryslân om ûnder te dûken. De besetter is op syk nei Folkert om't de Delftske studint wegere in loyaliteitsferklearring te ûndertekenjen. Folkert dûkt ûnder yn Seisbierrum, yn it gesin fan Filippus Bakker. Folkert wurdt hjir fereale, makket freonen en slút him úteinlik oan by in fersetsgroep, dy't de pleats Liauckema State as basis hat. Dizze 'Knokploech' (KP) docht ferskate oerfallen en oanslaggen, mar yn novimber 1943 giet it mis. De ploech wurdt ferret. Fiif leden oerlibje de oarloch net. De dan tweintichjierrige Folkert is ien fan dy fiif, ek al hat er net meidien oan aksjes dêr't bloed by floeide. Op 16 febrewaris 1944 wurdt er mei in pear oaren foar in fjoerpeloton set en deasketten. Flak foar syn dea skriuwt er in ôfskiedsbrief nei syn beminde Rie, én nei syn famylje út syn sel yn Amsterdam wei.

Nei de oarloch wurdt it lichem fan Folkert ferpleatst nei it earebegraafplak yn Bloemendaal. Oan de hân fan in hierlok en stikjes fan syn klean wurdt it lichem fan Folkert identifisearre troch Rie en syn heit. Ek binne der ferskate ôfskiedsbrieven en oare dokuminten fan de Knokploech út Seisbierrum bewarre bleaun.

agenda

ontdek hier de volledige agenda van fries museum op paad

fries museum op paad

binnenkort bij jou in de buurt

geweest

bekijk waar de bus al geweest is