As der net folle materiaal is om mei te wurkjen, moatst ymprovisearje mei watst hast. Yn de Twadde Wrâldoarloch al hielendal. Stoffen foar moaie jurken binne yn 1944 seldsum, mar soms komme se samar út de loft fallen. Foar Hinke Koopmans fan Garyp is dat seker sa. Sy trout yn in jurk makke fan parasjutestof. Nei alle gedachten komt dy fan in Amerikaanske bommewerper mei de bynamme ‘Yankee Rebel Harmony’. Dat tastel hat yn maart 1944 in needlâning makke by Warten.
Op freed 25 oktober 2024 wie it Fries Museum te gast yn Warten mei de orizjinele parasjutejurk fan Hinke Koopmans. Mei in feestlik programma fertelden wy mear oer de jurk, de draachster en it delstoarte fleantúch. Oerdeis koene besikers fan 15.00 oant 17.00 oere mei de hiele húshâlding oanskowe by in famyljeworkshop en in eigen miny-parasjute meitsje. Jûns fan 20.00 oant 20.30 oere fertelde ekspert Marre Sloots (konservator fan it Fries Verzetsmuseum) mear oer Hinke en de Twadde Wrâldoarloch yn Fryslân.
Aron Weidenaar makke foto's, besjoch se hjirûnder.
