Fan wa bisto ien? Wêr komsto wei? Wa'tst hjoed bist, is in optelsom fan in hiel soad dingen. Hoe maklik wie it foar dyn pake en beppe om nei skoalle te gean? Hoe is dyn doarp troch de jierren hinne feroare? Wat fûnen dyn âlden normaal? It binne allegearre stikjes dy't dy wat meitsje. De kommende jierren giet it Fries Museum 'op paad' troch Fryslân mei in bus fol stikken dy't wat sizze oer dy. Oer ús. Oer ús provinsje en ús gewoanten. En it moaie is: it binne ek écht stikjes fan dy.
Op sneon 1 maart wie it museum, mei de museumbus, te gast op de maitiidsmerk fan Sint Jabik! By de bus wiene ferhalefertellers oanwêzich om de ferhalen achter dizze ‘stikjes fan dy’ te fertellen, wêrûnder in écht skilderij fan Piet Mondriaan! Ek wie der in spesjale workshop wêryn't famyljes oan de slach gean mei it fersieren fan harren eigen Fries Museum op Paad-tasje. Mei stimpels en stiften makkest fan dyn taske in keunstwurk datst mei op paad nimme kinst.
