feanwâlden

Op woansdei 22 jannewaris 2025 wie it Fries Museum te gast yn Feanwâlden. Mei in feestlik programma foar jong en âld fertelde it museum mear oer in bysûndere âld-ynwenster fan Feanwâlden, Houkje Gerrits Bouma. Sy wûn yn 1809 in spesjale reedrydwedstriid foar froulju dy't doe in soad stof opwaaien die. Yn Museum de Schierstins wie op dizze dei in écht skilderij fan Nicolaas Baur te sjen wêrop't dit tafriel fêstlein is.

Oerdeis koene húshâldingen, mei harren (lyts)bern, oanskowe by in fergeze famyljeworkshop. Jûns fertelden eksperts Marlies Stoter (Fries Museum) en Wiebe Wieling (De Friesche Elf Steden) mear oer it skilderij, oer de skilder, oer Houkje by in 'winterske ferhalejûn'. Ek de Fryske winters fan doe, no en moarn kamen oan bod. Aron Weidenaar makke middeis in tal foto's, besjoch se hjirûnder.

oer it skilderij

Wa't oan Fryslân tinkt, tinkt oan iis. Gjin skepys of in raketsje, mar oan redens en de Alvestêdetocht. En seker yn Feanwâlden is de iiskultuer net fuort te tinken út it doarp.

De earste Alvestêdetocht is yn 1909 riden, mar al fier dêrfoar wurde troch de hiele provinsje reedrydwedstriden organisearre. Sa wurdt der 100 jier earder, yn 1809, in wedstriid riden yn Ljouwert oan de Westersingel (Prinsetún), spesjaal foar froulju. Dizze wedstriid wurdt wûn troch de 21 - jierrige Houkje Gerrits Bouma fan Feanwâlden. It tafriel is fêstlein troch Nicolaas Baur út Harns. Noch net mei in kamera fansels, mar mei oaljeferve op in paniel.

Sa'n 64 froulju tusken de 16 en de 36 jier (de âldste wie úteinlik 27) striden yn de foarrondes tsjin inoar. Om goed reedride te kinnen moasten se har boppeklean útdwaan: in part fan har kâldste skonken waard sa sichtber en dat yn kombinaasje mei har bleate earms joech oanlieding ta artikels yn'e krante oer sedeleazens. Fansels wiene der ek minsken, dy geniete fan it sjen nei dizze sportive froulju. As winneres krige Houkje in gouden earizer. Foar Houkje sil it winnen fan de wedstriid in geweldige opstekker west ha: acht moannen dêrfoar wie har mem op 43 - jierrige leeftiid ferstoarn en as âldste dochter fan in skipper kaam de soarch foar de bernerike húshâlding op har del.