Op freed 11 oktober 2024 wie it Fries Museum ‘op paad’ yn Earnewâld. Mei in feestlik programma foar jong en âld ûntdutsen bewenners mear oer Hinke Koopmans. Hinke troude yn in jurk dy't se sels makke fan parasjutestof. Dizze stof kaam fan in Amerikaanske bommewerper dy't in needlâning makke tusken Earnewâld en Warten. Oerdeis koene famyljes mei-inoar blomkorsaazjes meitsje fan âlde troujurken, en jûns fertelde Marre Sloots (konservator Fries Verzetsmuseum) mear oer de jurk, de draachster en it fleantúch. Antsje, Hinke har dochter, fertelde mear oer har mem en har húshâlding. Aron Weidenaar makke de hiele dei foto's, besjoch se hjirûnder.
oer de parasjutejurk
As der net folle materiaal is om mei te wurkjen, moatst ymprovisearje mei watst hast. Yn de Twadde Wrâldoarloch al hielendal. Stoffen foar moaie jurken binne yn 1944 seldsum, mar soms komme se samar út de loft fallen. Foar Hinke Koopmans fan Garyp is dat seker sa. Sy trout yn in jurk makke fan parasjutestof. Nei alle gedachten komt dy fan in Amerikaanske bommewerper mei de bynamme ‘Yankee Rebel Harmony’. Dat tastel hat yn maart 1944 in needlâning makke tusken Warten en Earnewâld.