beladen lânskip

fan kiefer oant ristelhueber

Auschwitz, Lampedusa en Aleppo. Plakken dy’t yn ús kollektive ûnthâld etst binne. Geweld, oarloch en konflikt teisterje dy plakken en litte har spoaren nei, soms sichtber, soms ûnsichtber. Beladen landschap: van Kiefer tot Ristelhueber toant de ferbyldingen fan ‘beladen’ lânskippen troch fyftjin keunstners. Foar Anselm Kiefer is hiel Dútslân as lânskip besmet. Yn de tentoanstelling is syn wurk Bilder-Streit te sjen. Mei typearjende materialen as linoleum, oaljeferve, sân en jute toant hy syn ferlet fan in nije Dútse identiteit. Dêr’t Kiefer in syktocht ferbyldet, leit Sophie Ristelhueber letterlik de besteande spoaren fan konflikt fêst.

Soms eaget it ferbylde lânskip ûnskuldich en is it de skiednis dy’t der betsjutting oan jout. Mei de titel Road to Auschwitz jout Hannah Collins in sa foar it each rêstich boeredykje in sinistere lading. Yn it wurk fan Raquel Maulwurf wurdt de taskôger krekt konfrontearre mei in troch geweld en konflikt teskroeid lânskip. Hoewol’t har tekeningen nei it ferline ferwize, binne se ek aaklik aktueel.

Ek yn nije keunstfoarmen spylje beladen lânskippen in rol, sa lit rapper M.I.A.ús sjen yn Borders. Yn har fideoclip besykje wanhopige flechtlingen in heech stek te beklimmen. Olphaert den Otter stelt yn syn searje Homemade de selsboude ûnderkommens fan flechtlingen sintraal. De typyske blauwe seilen dy’t op ien fan syn skilderijen te sjen binne, kenne we fan it koartlyn opbrutsen tintekamp yn Calais.

De tentoanstelling Beladen landschap: van Kiefer tot Ristelhueber toant hoe’t spoaren fan oarloch en konflikt yn hannen fan keunstners in metafoar foar minslikheid wurde. Yn totaal binne der 67 wurken fan Francis Alÿs, Armando, Hans Citroen, Hannah Collins, Ori Gersht, Charles Heller en Lorenzo Pezzani, Marcel van Hoorn, Anselm Kiefer, Mathieu Knippenbergh, M.I.A., Raquel Maulwurf, Johan Nieuwenhuize, Olphaert den Otter, Karin Peulen en Sophie Ristelhueber te sjen.