fryslân fan boppen

Alve foto’s fan de yn loftfotografy spesjalisearre fotograaf Siebe Swart foarmje de kearn fan de nije fototentoanstelling. Ut fûgelperspektyf wei sjogge wy hoe’t polders op Flylân opgean yn natuergebiet, hoe ’t de ‘Sintrale As’ ûnbeskamsum it iuwenâlde kûliselânskip fan de Noardlike Fryske Wâlden trochsnijt, hoe’t Wierum omjûn wurdt troch in mearkleurige lapketekken fan ikkerkes. Swarts foto fan de greiden by Jorwert toane âlde, grillich foarme wettergongen, njonken moderne, rjochte sleatten as gefolch fan de ruilferkaveling. Gers, greppels en wetter, it liket abstrakte keunst. Itselde is it gefal by de ferfrjemdzjende foto's dy't Gerco de Ruijter yn 2009 mei in draak makke. Hy liet him liede troch de wyn en it tafal.

Ek de betiidste loftfoto's fan Fryslân meitsje diel út fan de tentoanstelling. Se binne makke tusken 1916 en 1939 en toane in suver lege en lanlike provinsje. Sa leit it terpdoarpke Wânswert rêstich te slûgjen yn de simmersinne, wylst boeren op it lân it hea sammelje. It liket in tiidsbyld dat lang lyn ferlern gien is. Mar ropt de hjoeddeistige foto fan Siebe Swart fan it doarpke Dedzjum net krekt in selde ferstille gefoel op?