Omrop Fryslân lansearret nije edukative searje oer de Twadde Wrâldoarloch

Tsjil Tsjekt - Oarloch yn 'e klasse wurdt op 27 maart 2025 lansearre yn in spesjale ûnderwiismiddei yn it Fries Museum

05 februari 2025

Yn 2025 steane we stil by in bysûndere mylpeal: 80 jier frijheid. Mar hoe praatst dêroer mei learlingen? En hoe makkest dy gefoelige aktuele tema’s besprekber?
Om dit, it besprekber meitsjen fan dit ûnderwerp foar learlingen, foarinoar te krijen, sille der ferskate partijen gearwurkje. Yn it ramt fan 80 jier befrijing lansearret Omrop Fryslân Tsjil in nije edukative searje oer de Twadde Wrâldoarloch: Tsjil Tsjekt - Oarloch yn 'e klasse. Om dy searje te yntrodusearjen en leararen te foarsjen fan ynsjoch yn hoe't se skiednis en frijheid yn de klasse besprekber meitsje kinne, wurdt op 27 maart 2025 in spesjale ûnderwiismiddei organisearre yn it Fries Museum.

De skiednis tichtby

De fiifdielige searje Tsjil Tsjekt - Oarloch yn 'e klasse bringt de skiednis fan de Twadde Wrâldoarloch tichter by learlingen fan groep 7 en 8, troch ynteraktive lessen mei edukative fideo's en opdrachten. De special is ûntwikkele yn gearwurking mei Afûk en it Fries Verzetsmuseum en wurdt meifinansiere troch de Provinsje Fryslân.

Learlingen wurde meinaam nei de oarlochsjierren yn Fryslân en ûntdekke hoe't bern fan doe dy perioade belibbe hawwe. Se sille bygelyks koades foar wapendroppingen ûntsiferje, it lot fan in Joadsk gesin opspoare en online it grêf fan in alliearde piloat fine.
It lesmateriaal is fergees en tagonklik yn Spoar 8, de lesmetoade foar de Fryske taal yn it basisûnderwiis.

Tsjil Tsjekt - Oarloch yn 'e klasse is ûntstien út in gearwurking tusken Omrop Fryslân, Afûk en it Fries Verzetsmuseum.

Tsjil Tsjekt - Oarloch yn 'e klasse wurdt mei-finansierd troch de Provinsje Fryslân en Taalplan Frysk.